नाशिक : बदलापुरातील प्रकरण ताजं असतानाच नाशिकमधील सिन्नर येथील एक प्रकरण समोर आलं आहे. नाशकात साडेचार वर्षांच्या मुलीचं अपहरण करुन तिच्यावर लैंगिक अत्याचार केल्याची धक्कादायक घटना उघडकीस आली आहे. नाशिक जिल्ह्यातील सिन्नर तालुक्यातील वावी पोलीस ठाण्याच्या हद्दीतील घटना उघडकीस आल्यानंतर राज्यात पुन्हा एकदा संतापाची लाट उसळल्याचं पाहायला मिळत आहे. नराधमाने साडेचार वर्षांची चिमुकली घरासमोर खेळत असताना तिचे अपहरण केलं आणि त्यानंतर तिच्यावर अत्याचार केल्याची धक्कादायक घटना घडली. चिमुकली राहत असलेल्या गावातील एका संशयिताने हे संतापजनक कृत्य केल्याची माहिती प्राथमिक तपासात समोर आली आहे.
चिमुकलीच्या नातेवाईकांनी पोलिस स्टेशनमध्ये तक्रार दिल्यानंतर पोलिसांनी शोध घेत मुलीची सुटका केली. तर संशयित आरोपीला पोलिसांनी ताब्यात घेतले. नाशिकच्या वावी पोलीस ठाण्यात या प्रकरणी गुन्हा दाखल करण्यात आला आहे. तर, या प्रकरणी पोलिसांकडून कसून तपास सुरू आहे.
सोमवारी संध्याकाळी चिमुकली आपल्या घरासमोर खेळत होती. त्याचवेळी गावातील एक तरुण चिमुकलीजवळ आला. टिल्लू असं त्याचं नाव असल्याची माहिती समोर आली आहे. याच तरुणाने चिमुकलीचे अपहरण केलं. बराच वेळी चिमुकली आली नाही, त्यामुळे तिच्या कुटुंबियांनी तिचा शोध घेतला. पण चिमुकली कुठेच सापडली नाही. त्याचवेळी चिमुकलीसोबतच हा तरुणही बेपत्ता असल्यानं सर्वांचा संशय बळावला. कुटुंबियांनी तात्काळ पोलिस स्टेशनमध्ये धाव घेतली. पोलिस स्टेशनमध्ये चिमुकली बेपत्ता असल्याची तक्रार दाखल झाल्यानंतर पोलिसांनी आपल्या तपासाची सूत्र तात्काळ हलवण्यास सुरुवात केली. त्यानंतर दुसऱ्या दिवशी तरुणाला ताब्यात घेण्यात आले. चिमुकलीचे त्यानेच अपहरण केल्याचे समोर आलं.
चिमुकली सापडल्यानंतर पोलिसांनी तात्काळ तिला रुग्णालयात दाखल केलं. उपचारानंतर तिला तिच्या कुटुंबियांकडे सोपवण्यात आलं. या प्रकरणातील संशयित तरुणाला ताब्यात घेण्यात आलं असून त्याच्यावर गुन्हा दाखल करण्यात आला आहे. सिन्नर तालुक्यातील मरोळ हे छोटसं गाव आहे. तिथे ही धक्कादायक घटना घडली आहे.
