ढाका : बांगलादेशाचे अध्यक्ष मोहम्मद शहाबुद्दीन यांनी नोबेल पारितोषिक विजेते बँकर महंमद युनूस यांची बांगलादेशच्या हंगामी सरकारच्या प्रमुखपदी नियुक्ती केली आहे, अशी माहिती अध्यक्षांच्या प्रसिद्धी सचिवाने मंगळवारी रात्री दिली. युनूस यांच्याकडे हंगामी सरकारचे नेतृत्व सोपवण्याचा आग्रह तेथील विद्यार्थी संघटनांनी धरला होता.
आम्ही सुचविलेल्या सरकारखेरीज अन्य कोणतेही सरकार मान्य करणार नाही, असा पवित्रा विद्यार्थी संघटनांनी घेतला होता. दरम्यान, बांगलादेशाचे अध्यक्ष महंमद शहाबुद्दीन यांनी मंगळवारी देशाची संसद विसर्जित करून नव्याने निवडणूक घेण्याचा मार्ग मोकळा केला. त्यानंतर विद्यार्थी आंदोलनाचे समन्वयक आणि अध्यक्ष शहाबुद्दीन यांच्यात झालेल्या बैठकीमध्ये युनूस यांच्याकडे हंगामी सरकारचे नेतृत्व सोपवण्याचा निर्णय घेण्यात आला. यावेळी तिन्ही सैन्यदलांचे प्रमुख उपस्थित होते. विविध राजकीय पक्षांशी सल्लामसलत केल्यानंतर हंगामी सरकारमधील इतर सदस्यांच्या नावांवर शिक्कामोर्तब केले जाईल, असे प्रसिद्धी सचिवांनी सांगितले.
सध्याच्या आंदोलनातील एक प्रमुख संघटना असलेल्या ‘स्टुडंट्स अगेन्स्ट डिस्क्रिमिनेशन’ या संघटनेचा नेता नाहीद इस्लाम याने मंगळवारी समाजमाध्यमावर पोस्ट केलेल्या व्हिडीओमध्ये म्हटले होते की, नोबेल पारितोषिक विजेते महंमद युनूस यांचे नाव आम्ही हंगामी सरकारचे प्रमुख म्हणून सुचविले आहे. आम्ही युनूस यांच्याशी आधीच चर्चा केली असून, त्यांनी ही जबाबदारी स्वीकारण्याची तयारी दाखवली आहे.’ अध्यक्षांनी हंगामी सरकार स्थापन करण्यासाठी नेमलेल्या समितीचाही नाहीद इस्लाम सदस्य आहे. महंमद युनूस सध्या ऑलिम्पिक स्पर्धा पाहण्यासाठी पॅरिसमध्ये असल्याची माहितीही विद्यार्थी नेत्यांनी दिली.
‘बांगलादेश नॅशनलिस्ट पार्टीच्या अध्यक्ष आणि माजी पंतप्रधान बेगम खालिदा झिया यांची नजरकैदेतून मुक्तता करण्यात आली आहे. झिया यांचे वय ७९ वर्षे असून, त्यांना मूत्रपिंड, फुप्फुस आणि हृदयाचे आजार जडले आहेत. त्याचबरोबर एक जुलैनंतर अटक करण्यात आलेल्यांच्याही मुक्ततेची प्रक्रिया सुरू करण्यात आली आहे,’ असेही प्रवक्त्याने सांगितले.
