रत्नागिरी : मुंबई-गोवा महामार्गावरील कामथे येथे रस्त्याच्या बाजूला थांबलेल्या कंटेनरला आयशर टेम्पोची मागून जोरदार धडक बसल्याने या अपघातात दोघांचा दुर्दैवी मृत्यू झाला आहे. ही घटना आज गुरुवारी सकाळी घडली आहे. या अपघातात ऋत्विक शिरोडकर आणि रामकृष्ण शेणई अशी मृत्यू झालेल्यांची नावे आहेत.
कंटेनर क्रमांक MH 46 BU 1406 आणि आयशर गाडी क्रमांक MH 07 AJ 1771 ही गाडी मागून या उभ्या असलेल्या ट्रेलरला धडकल्याने हा भीषण अपघात झाला. आयशरमधील दोघांचाही मृत्यू झाला आहे. मृत्यू झालेले वाहनचालक आणि त्यांच्यासोबत असलेले शिरोडकर हे दोघेही सिंधुदुर्ग जिल्ह्यातील असल्याची माहिती मिळाली आहे. चिपळूण पोलिसांनी नातेवाईकांकडे संपर्क साधला आहे. नातेवाईक चिपळूण येथे येण्यास निघाले आहेत. मात्र दोघांचाही मृत्यू झाल्याने याबाबत अधिक माहिती मिळू शकलेली नाही. दरम्यान मृत्यू झालेले दोघेजण सिंधुदुर्ग जिल्ह्यातील वेंगुर्ला तालुक्यातील असल्याची माहिती पोलीस सूत्रांनी दिली आहे.
मुंबई-गोवा राष्ट्रीय महामार्गावर यापूर्वी अनेकदा अपघात घडले आहेत. अनेकांचे आजवर जीव गेले आहेत. रस्त्यावर उभ्या असलेल्या वाहनाला धडक लागल्याने मृत्यू झाल्याचे प्रकार याच महामार्गावर घडले आहेत. कामठे येथे झालेल्या अपघाताची नोंद करण्याचे काम सुरू आहे. मुंबई-गोवा राष्ट्रीय महामार्गाचे काम पूर्ण झालेले नाही. अनेक ठिकाणी खड्डे पडले आहेत. गणेशोत्सवाच्या पार्श्वभूमीवर या महामार्गाचे काम तातडीने पूर्ण करावे, अशी मागणी आता होऊ लागली आहे. या महामार्गाच्या कामाच्या विरोधात जनआक्रोश समितीनेही नाराजी व्यक्त केली आहे.
या अपघाताची माहिती मिळताच राष्ट्रवादी काँग्रेस अल्पसंख्यांक सेलचे चिपळूण तालुकाध्यक्ष समीर काझी यांच्यासह शुभम कीलजे, अण्णा कुडाळकर, बंटी महाडिक, संतोष जावळे, सुदेश महाडिक, भाऊ लकेश्री, दशरथ खेडेकर, सार्थक महाडिक, शैलेश माटे आदी ग्रामस्थांनी घटनास्थळी धाव घेत आयशर टेम्पोमध्ये मृतावस्थेत अडकलेल्या दोघांना बाहेर काढून कामथे रुग्णालयात हलवण्यात आले आहे. अपघात इतका भीषण आहे की आयशर टेम्पोच्या केबीनचा अक्षरश: चक्काचूर झाला आहे.
