पुणे : IBPS परीक्षा आणि MPSCची राज्य सेवा संयुक्त पूर्व परीक्षा या दोन्ही परीक्षा एकाच दिवशी ठेवण्यात आल्याच्या निर्णयाविरोधात पुण्यात MPSCच्या विद्यार्थ्यांकडून आंदोलनाला मोठं यश आलं असल्याचं समोर आलं आहे. MPSCच्या आज गुरुवारी झालेल्या बैठकीत २५ ऑगस्टची परीक्षा पुढे ढकलण्याचा मोठा निर्णय घेण्यात आला आहे. आज रोजी आयोजित आयोगाच्या बैठकीमध्ये रविवार, दि. २५ ऑगस्ट २०२४ रोजी नियोजित महाराष्ट्र राजपत्रित नागरी सेवा संयुक्त पूर्व परीक्षा २०२४ पुढे ढकलण्याचा निर्णय घेण्यात आला. परीक्षेची दिनांक लवकरात लवकर जाहीर करण्यात येईल, असं ट्वीट करत महाराष्ट्र लोकसेवा आयोगाकडून ही घोषणा करण्यात आली आहे.
विद्यार्थ्यांची अजून एक मागणी
लोकसेवा आयोगाने पुढे ढकलण्यात आलेल्या परिक्षेत कृषी विभागाच्या २५८ जागांचा देखील समावेश करावा. या २५८ जागांसाठी परिक्षा घेण्याचे नोटीफिकेशन काढावे अशी विद्यार्थ्यांची मागणी आहे. तोपर्यंत आंदोलन मागे न घेण्याचा विद्यार्थ्यांचा निर्णय आहे. कृषी विभागाच्या जागांबाबत जोपर्यंत निर्णय होत नाही तोपर्यंत आंदोलन सुरुच राहणार आहे.
मी स्वतः आंदोलनात सहभाी होईल
दरम्यान, या आंदोलनात शरद पवार गटाचे आमदार रोहित पवार सहभागी झाले होते. तर शरद पवार यांनीही राज्य सरकारला इशारा दिला होता. ”पुण्यात MPSCच्या विद्यार्थ्यांनी पुकारलेल्या आंदोलनासंदर्भात विद्यार्थ्यांच्या हिताचा विचार करणे सरकारचे कर्तव्य आहे. परंतु सत्ताधारी याला गांभीर्याने घेताना दिसत नाही. उद्यापर्यंत यावर सरकारने योग्य भूमिका स्पष्ट केली नाही. तर मी स्वतः आंदोलनात सहभागी होऊन विद्यार्थ्यांना न्याय मिळवण्यासाठी मैदानात उतरेन”, असा इशारा शरद पवार यांनी दिला होता.
